Destinacioni: Moskë

Çfarë të kujton: Baleti, bizhuteritë, vodka dhe Sheshi i Kuq? Moskën pa dyshim!

Edhe nëse shihet gjatë një stuhie dëbore apo gjatë një dite vere me qiell të shndritshëm peisazhi arkitektonik i Moskës të ngjallë ndjenjën e frikës. Nga katedralja e Shën Vasilit dhe fasada e madhe e Kremlinit te ndërtesat e periudhës sovjetike, peisazhet e qytetit janë të mbushura me histori. Për ata që janë të dashuruar me kulturën, Moska mburret me muzetë e klasit botëror, prodhimet mahnitëse të baletit, teatrin Bolshoi si dhe me koncertet klasike në Konservator.

Cdo udhëtim në Moskë duhet të fillojë me një vizitë në Sheshin e Kuq, i cili ndodhet në zemër të qytetit. Ai përmban monumente të shekujve të ndryshëm si “Katedralen e Shën Vasilit’ (shek 16), mauzoleumi i Leninit, “Kremlinin” (shek. 19) si dhe harqet moderne të qendrës tregtare “GUM”. Katedralja e Shën Vasilit u ndërtua në mes viteve 1555-1561 nga Princi i Madh i Moskës, i njohur si Ivani i Tmershëm. Sipas gojëdhënave Ivani urdhëroi verbimin e arkitektëve të katedrales pas përfundimit të punës për të parandaluar që të ndërtohej një kopje e saj. Katedralja ka nëntë kupola zbukuruar me ornamente e shumë ngjyra.

Bëni një shëtitje në kopshtet elegante të parkut Aleksandër para se të shihni Pallatin e Kremlinit, një nga rezidencat e carëve në Moskë. Për fat të keq ai është i mbyllur për turistët, megjithatë arkitektura e tij është mbresëlënëse e parë edhe nga jashtë. Nqs doni më shumë vizitoni Muzeun Historik, ku mund të shihni vezët e cmuara “Faberge”, “Galerinë Tretyakov” apo muzeun “Pushkin”, i cili përmban antika nga Egjipti, Greqia dhe Roma.

Në pranverë kur bora shkrihet, rrugët me kalldrëm të qytetit, parqet dhe sheshet është më e lehtë t’i përshkosh. Bëni ture nëpër parkun “Izmailovsky” ku Pjetri i Madh kaloi pjesën më të madhe të jetës së tij. Një tjetër alternativë është të bëni një udhëtim me barkë në lumin Moskva duke shijuar pamjet e monumenteve të qytetit nga uji. 

Së fundmi është rihapur pas restaurimit “Teatri i Bolshoit". Kaloni një mbrëmje aty duke ndjekur disa nga prodhimet e tij të klasit botëror. 

Të dashuruarit pas muzikës mund të ndjekin koncertet në Konservatorin e famshëm të Moskës, ku kompozitori romantik Pyotr Tchaikovsky ka krijuar muzikë në shekullin e 19-të. Për ushqim shkoni te “Café Pushkin”, që ndodhet afër “Sheshit Pushkin”, e cila edhe pse është hapur në vitin 1999 është dekoruar sipas stilit të vjetër dhe përmban piktura e mobilje antike. 

Aty do të gjeni dhe receta të fashme, por pak të kripura. Sic dihet qendra e Moskës është e mbushur me hotele luksoze dhe një ndër më të njohurit është hoteli “Metropol”. Ai ndodhet përballe teatrit Bolshoi dhe është shumë afër me Sheshin e Kuq. 

Max Travel ka udhëtimin ideal për në Moskë. 

✽ Periudha: 15 - 19 Maj 
✽ Cmimi 760 Euro/Personi
✽ Udhëtimi Vajtje-Ardhje me Avion
✽ Akomodimi në Hotel me 4* me mëngjes në Moskë
✽ Akomodimi në Hotel me 4* me mëngjes ne St. Petërsburg
✽ City Tour Moskë
✽ City Tour St. Petërsburg
✽ Bileta e trenit Moskë- St. Petërsburg
✽ Viza Turistike
✽ Guide Profesionale

Rezervoni me Max Travel, agjent shitjeje i mbi 150.000 hoteleve dhe shërbimeve turistike në mbarë botën.
E-mail: max-travel@live.com
Skype: max-travel-albania
Tel:+355 44 311 505
Cel: +355 673 607 467
Cel: +355 672 789 495

Ishujt Turk dhe Caicos - Mrekullia mbi Tokë

Ju prezantojmë me një nga perlat më të bukura dhe të rralla të Karaibeve.
Njëra prej tyre quhet ishujt “Turk dhe Kaikos”, të ndodhur në Karaibe dhe të bekuar me një rivierë detare përrallore.

Historia tregon se ishujt nisën të banoheshin rreth shekullit të pestë, nga disa fise indianësh që mbërritën në Turk nga deti.Pavarësia e tyre zgjati deri në 1512, kur ia behën pushtuesit spanjollë, por duke qenë tepër të vegjël dhe të parëndësishëm, arkipelagu vazhdoi të ishte vetëm një pikë ndalese, por jo pushtimi për spanjollët. Në shekujt në vazhdim, deri në XVIII, herë britanikët, e herë francezët me holandezët vizitonin ishujt, duke qëndruar më së shumti për pak ditë.

Britania nisi të popullonte ishujt vetëm në fillimin e viteve 1 800, duke ndërtuar qendra të vogla, në fillim prej qindra banorësh, për të mbërritur sot në 45 mijë banorë. Megjithatë, në një epokë ku turizmi është shndërruar në një prej industrive më të mëdha botërore, papritmas Britania gjendet me një perlë në duart e saj.

Pothuajse të panjohur, ishujt janë vendosur për natyrën e mrekullueshme dhe resortet e shkëlqyera që zotërojnë në rekomandimet kryesore të faqeve ndërkombëtare të turizmit dhe u shndërruan në një prej destinacioneve më të preferuara të 2012-s. 

I love New York

10 ishujt Grekë që duhet të vizitosh patjetër

Ishujt Grekë janë gjithmonë të preferuar nga turistët. Ne kemi zgjedhur 10 më të mirët prej tyre.

1.       Santorini është mjaft popullor për shtëpitë e bukura të bardha, panoramën spektakolare, magjinë e perëndimit të diellit dhe vullkanin aktiv.

2.       Kreta është ishulli më I madh i Greqisë me një popullësi tejet të dendur në krahasim me ishujt e tjerë. Në Kretë mund të gjesh disa alternative akomodimi, dyqane, klube nate dhe restorante. Qytetet e vjetra të Rethymno dhe Chania janë shumë të bukur dhe gjithmonë të vizituar nga turistët. Plazhet janë absolutisht fantastike dhe fshatrat ofrojnë ushqimin më të mirë në të gjithë Greqinë

3.       Mykonos është një ishull multi-etnik që ofron një jetë nate të çmendur. Ishulli është plot e përplot me njerëz të famshëm dhe homoseksualë gjatë verës. Është një nga ishujt më të shtrenjtë ndaj nëse shkon sigurohu të kesh portofolin plot me para dhe karta krediti.

4.       Hydra është një ishull shumë I bukur me një arkitekturë të vecantë dhe me rregulla strikte. Makinat dhe motocikletat janë të ndaluara, mushka është mënyra më e mirë e transportit. Jeta e natës nuk është shumë e ndezur ndaj pushimet në Hydra janë për ata që kërkojnë qetësi.

5.        Chios është një ishull mjaft i këndshëm dhe shumë pranë Turqisë. Atraksioni më i bukur është Nea Moni, një manastir i shekullit të 11-të.

6.       Paros është më i bukuri nga të gjithë ishujt grekë. Ai ofron plazhe që të lënë pa frymë dhe një jetë nate të ndezur. Rrugicat janë të gjitha të zbukuruara me lule. Plazhet janë për të gjithë. Ke plazhe të izoluara dhe plazhe të mbipopulluara.

7.       Korfuzi ofron një diversitet maksimal sa i përket atraksioneve, kulturave dhe panoramave të bukura. Arkitektura e qytetit të sjell ndërmënd stilin Italian, Grek, Britanik dhe Francez. Plazhet janë tmerrësisht të bukur dhe në Korfuz mund të gjesh qetësinë që kërkon.

8.       Skiathos. Nëse të pëlqen natyra duhet të shkosh në Skiathos patjetër. Ishulli ofron atraksione të shumta si kështjella mesdhetare, manastirë dhe muze. Është ishulli perfekt për familjarë.

9.       Rodos është një ishull për ata që duan historinë dhe duan të dinë më shumë për të. Në Rodos gjen, Akropolisin e Lindos, Pallatin e Guvernatorit etj. Në Rodos gjen një miksim të kulturës Turke dhe Greke.

10.   Samos është një destinacion mjaft popullor sepse është më diellori në të gjithë Europën. Plazhet, uji kristal dhe eksperiencat nënujore por edhe atraksionet historike e bëjnë këtë ishull një nga 10 më të bukurit e Greqisë. 

10 gjëra që duhet të bësh kur viziton Santorinin

Në Santorini ndihesh si në asnjë vend tjetër të botës. Këtu gjithçka është më me dritë. Shtëpitë e bardha me kamaret e tyre, detin dhe perëndimet e diellit, e bëjnë  ishullin grek të Cikladeve të parin në listën e pesë ishujve më të bukur në botë.

1.       Tek Ammoudi për drekë

Një nga momentet më të preferuara për mua përveç notit në ujërat kristal në Santorini është padyshim ai momenti kur je lodhur pas një dite të gjatë plazhi dhe ulesh në tavernën me mure të verdha për një pjatë peshku. Ndërkohë je duke pritur për perëndimin e diellit  dhe ndërsa dielli zhduket pas Thirasias, tek taverna Ammoudi ke mundësinë të shohësh një spetakël të gjatë dielli ndërsa shijon ushqimin më të mirë dhe verën më të mirë

2.       Vendet më të mira për të parë perëndimin e diellit

Të shohësh perëndimin e diellit në Kështjellën e Oias është një mrekulli, por ky vend nuk është i vetmi për të parë spektaklin qiellor. Një perëndim spektakolar dielli mund ta shohësh edhe në Fira, Firostefani dhe Imerovigli (tek Skaros është më mirë). Ta shohësh perëndimin e diellit nga një këndvështrim tjetër duke vëzhguar gjithë Santorinin në të njëjtën kohë duhet të shkosh tek Faros në Akrotiri. Një opsion tjetër është Profitis Illias apo plazhi Vlihada ku do të mahnitesh nga panorama vullkanike që ndryshon ngjyra me perëndimin e diellit.

3.       Qëndro në shtëpitë tradicionale

Arkitektura e Santorinit është shumë e veçantë. Shtëpitë e stilit Yposkafo (shtëpi në shpellë) u ndërtuan nga të varfrit e Santorinit që të mbroheshin nga era. Ditët e sotme, arkitektët e famshëm  i kanë transformuar këto shtëpi në resorte luksoze dhe modern. Është një eksperiencë që ia vlen (qoftë edhe për një natë) pavarësisht klaustrofobisë që ndjen kur futesh brenda tyre.

4.       Vizito muzeumet

Të vizitosh Muzeun Parahistorik të Thirës apo Muzeun Arkeologjik të jep ndjesinë sikur po zhytesh brenda një historie të gjatë dhe të lashtë të ishullit. Muzeu Parahistorik i Thirës mban relike të zbuluara gjatë gërmimeve në Akrotiri. Ndërsa Muzeu Arkeologjik mban koleksione skulpturash që nga Epoka Arkaike në atë Romake.

5.       Vizito Akrotirin

Në asnjë vend të botës nuk do të gjesh një gjë të tillë. Është sikur po udhëton pas në kohë. Të ecësh në rrugët dhe sheshet e qytetit parahistorik të 30.000 banorëve dhe të admirosh ndërtesat e një finese të lartë të shekullit të 17 para Krishtit është e mrekullueshme.

6.       Scuba diving

Ata që preferojnë të eksplorojnë botën nënujore në Santorini do të ndihen si në shtëpi. Eksperiencë e mrekullueshme është kur shikon në fund të detit gurët vullkanikë dhe pafundësinë e Kalderës.

7.       Provo kuzhinën e Santorinit

Fuqinë e Santorinit mund ta ndiesh edhe nëpërmjet aromave të produkteve të tokës që gatuhen me mjeshtëri nga vendasit. Ushqimet tradicionale duhet patjetër ti shoqërosh me një shishe vere “Santorini” që ka tipare të vecanta dhe një aciditet metalik.

8.       Shko në ekskursion

Zgjidh disa paketa turistike që përfshijnë vizita në Ujërat termale vullkanike. Kalo pak kohë në Thirasia dhe eksploro zonën e Potamos dhe Manolas dhe më pas noto në Korfos (portin e vjetër) ku mund të provosh një gatim të mirë në një nga tavernat e shumta.

9.       Vizito fshatin e Emporio’s

Fshati i Emporios ndodhet në zemër të ishullit të Santorinit dhe shumë pranë plazheve të Perivolos dhe Perissa. Në Emporio mund të shëtisësh nëpër rrugët e Kastelit (Kështjellës së Santorinit) dhe të admirosh kishat e bukura dhe të bësh fotografi unike. Ia vlen të vizitosh kishën e Panagia Mesiani, e dyta për nga rëndësia në ishull.

10. Argëtohu, Relaksohu dhe Dashurohu me Santorinin

Për herë të parë në Budapest

Budapesti njihet si “Parisi i Lindjes”. 

Është një qytet i mrekullueshëm i mbushur me atraksione intriguese që ofrojnë një atmosferë fantastike dhe një panoramë që të lë pa frymë. Qyteti gjithashtu është Trashëgimi Botërore e Uneskos por jo vetëm për këtë arsye duhet të futet në listën e qyteteve të duhet të shohësh patjetër. Ne kemi identifikuar disa aktivitete që duhet ti bësh patjetër kur viziton Budapestin për herë të parë.

•    Bëj në banjë

Në Budapest duhet të lahesh patjetër. Banjat termale të Hungarisë janë të famshme dhe janë influencuar padyshim nga Hamamet turke për të cilat duhet të jemi mirënjohës.

Këto banja termale janë një mrekulli e natyrës. Një eksperiencë e ngrohtë dhe e mrekullueshme që do tju pëlqejë shumë. Shumica e qëndrave të relaksit në Budapest ofrojnë masazhe dhe dhoma avulli fantastike . Nëse do të shohësh burimin e këtyre ujrave të ngrohta atëherë duhet të vizitosh tunelet e nëndheshëm të qytetit që janë në formën e shpellave mistike.

•      Ushqehu sipas stilit Hungarez

Pas banjës të duhet një ushqim i mirë dhe tradicional. Restorantet në Budapest ofrojnë gjithashtu edhe verë të mirë të bardhë apo të kuqe sipas preferencës. Degustimi i verës së vërtetë hungareze është diçka që nuk 

duhet humbur

•        Një shëtitje në lumë

Lumi Danub ndan dhe bashkon Budën dhe Pestin.

Një shëtitje me anije është mjaft romantike sidomos nëse darkon në anije dhe kërcen nën vështrimin e yjeve duke admiruar në të njëjtën kohë edhe dritat e qytetit. Nëse zgjedh shëtitjen me anije gjatë ditës duhet patjetër të ndalosh në Ishullin Margaret dhe të shëtisës në parqet e tij. Nëse nuk të pëlqen lundrimi mund të ecësh dhe soditësh panoramën nga Ura e Zingjirit që lidh qytetin. Kjo urë u përfundua në vitin 1849 nën mbikqyrjen e arkitektit britanik Adam Clark. Ura është shumë e pëlqyer nga vendasit dhe turistët, madje konsiderohet si krenaria e Budapestit.

•       Vizito Labirintet dhe Kështjellat

Labirinti i Kështjellës së Budës njihet si një nga Mrekullitë e Nëndheshme të Botës.

Është një nga atraksionet më të vizituara të qytetit, dhe kur të futesh brenda tij do e kuptosh pse. Labirinti shtrihet në 9 kilometra dhe vëtm një kilometër i tij është i aksesueshëm nga turistët. Është tepër misterioz dhe për faktin se një prej të burgosurve të tij ka qenë pikërisht Kont Drakula që u burgos këtu në shekullin e 15-të.

• .       Shko në Opera

Gjatë ditës mund të mahnitesh nga arkitektura e mrekullueshme e qytetit, ndërsa mbrëmjeve mund të shijosh performanca operistike të një klasi të jashtëzakonshëm në Shtëpinë e Operas të Budapestit. Kjo shtëpi është një nga më të famshmet e botës për sa i përket akustikës së saj dhe për faktin që në të mund të akomodohen plot 1000 spektatorë. Do të ishte për të ardhur keq nëse nuk do tia lejoje vetes një vizitë në Shtëpinë e Operas.

• .       Shijo Budapestin natën.

Mund të jesh lodhur në shëtitjet e gjata ditën, por mos i kurse daljet në klubet dhe baret vibruese të qytetit. Pas një argëtimi në darkë mund të shkosh edhe njëherë tek banjat termale sepse gjatë natës kthehen në festa masive. Gjithashtu, të rekomandueshme janë edhe shëtitjet me anije gjatë natës. Ndërsa shijon kokteilet e shijshme lejoje veten të magjepset nga Budapesti i bukur 

10 GJËRA QË DUHET TË BËSH NË ROMË

Të gjitha rrugët padyshim të çojnë në Romë. 

Roma, e njohur ndryshe edhe si “Qyteti i Perjetshëm”, është një qytet ku hijeshia e pafundme nuk mund të përshkruhet vetëm me fjalë por mbi të gjitha duhet shijuar me sy. Edhe guri më i vogël dhe me i parëndësishëm në kryeqytetin italian ka dicka për të thënë rreth historisë së lashte të Romes. Kjo sepse qyteti ka qenë qendra e një perandorie , madhështia e së cilës nuk u arrit kurrë nga të tjerat, u bë burimi i kristianizmit, dhe  vendi ku kanë kaluar dhe qëndruar personazhe që kanë bërë apo kanë lënë gjurmë në historinë e njerëzimit.

Cfarë duhet të bëni në Romë? 

1. Vizitoni Koloseun 

Si fillim u inaugurua si Amfieteatri Flavio dhe më pas u quajt Colosseo ndoshta prej statujës së madhe të
njohur me emrin “Kolosi i Perëndisë Diell”, e vendosur pranë dhe që kishte ngjashmëri me Neronin. Romanët shkonin aty për të parë garat midis gladiatorëve dhe kafshëve të egra apo simulimet e betejave detare. Colosseo është ende një nga monumentet më të rëndësishme dhe përfaqësuese të Romës, që imponon praninë e tij madhështore në qendër të Romës.

2. Vizitoni Panteonin 

Pantheon-i është një nga monumentet më të njohura romake. Sipas një legjende, ai lind nga pika ku Romolo
në momentet e fundit të jetës, u kap me thonj nga një shqiponjë dhe u dërgua në qiell. Tempull i dedikuar të gjithë Perëndive ( Pan-të gjitha Theon-perënditë), u ndërtuar nga perandori Adriano në vitet 118-125 pas Krishtit, për të zëvendësuar tempullin e Marco Agrippa për hyjnitë e Marsit dhe Afërditës. Në vitin 609, tempulli u shndërrua në kishën romane me emrin Santa Maria ad Martyres. Në vitin 1870, u shndërrua në monumentin përkujtimor të mbretërve të Italisë. Në brendësi të tij ndodhen varret e Vittorio Emanuelle II, Umberto I dhe Margherita di Savoia, përveç atij të Raffaello Sanzio. Ajo që e karakterizon më shumë ndërtesën është kupola gjysmësferike me diametër 43.3m e barabartë me lartësinë nga dyshemeja.

3.  Vizitoni Fontana di Trevi 

Nëse ndodheni në Romë dhe mendoni të ktheheni sërish, atëherë mos u mendoni dy herë për të hedhur një
monedhe në të famshmin shatërvan të Trevi-t, për të realizuar dëshirat tuaja. I projektuar nga arkitekti Nicolo Salvi, shatërvani i Trevi-t merr ujë nga ujësjellësi Vergine që nga kohët e perandorit Augusto. Tema kryesore e shatërvanit është deti dhe këtu stili barok ndërthuret me atë klasik në një harmoni të përsosur. Shatërvani i Trevi-t  ka qenë set kinematografik, teatër manifestimesh dhe skenë shfaqjesh e festash të mëdha. Ta keni të qartë: vetëm Anita Ekberg në filmin “La dolce Vita” mundi të hyjë të bëjë banjë aty, mos provoni.

4. Vizitoni Piazza Navona 

Piazza Navona është një nga sheshet më të dashura për romanët dhe turistët, vendi ideal për të pushuar,
 duke qëndruar të ulur në tavolinat e bareve midis skulpturave dhe arkitekturave baroke. Piazza Navona lind në vendin e stadiumit antik të Domiziano-s, ja pse ka forme ovale. E kërkuar nga perandori për të zhvilluar garat e atletikës. Deri në shek. XIX, këtu organizoheshin shfaqje argëtuese dhe sportive. Gjatë muajit gusht, çdo vit sheshi përmbytej duke mbyllur të gjitha shkarkimet e shatërvanëve, për t’u ofruar pak freski qytetarëve romanë. Vepra më tërheqëse e saj është Fontana dei quattro Fiumi (Shatërvani i Katër Lumenjve), vepër e Gianlorenzo Bernini.


5. Vizitoni Musetë e Vatikanit 

Musei Vaticani të lindur nga tregtitë e papëve që prej shekujsh mblodhën vepra të jashtëzakonshme.
Muzeumet e Vatikanit konsiderohen si trashëgimitë më të bukura të muzeve të botës (13 muzeume të ndryshme nga njëri-tjetri), të pajisura me një nga koleksionet më të rralla të artit botëror. Thesarët e mëdhenj përbëhen nga vepra të antikitetit grek e roman, por edhe nga një koleksion i pasur arti egjiptian (mumiet) dhe etrusk. Galeria e arteve ruan një koleksion të çmuar me pikturat e shekujve XII-XIX, vepra të Raffaello, Caravaggio dhe Leonardo Da Vinci.


6. Vizitoni lagjen Trasvestere 

Trastevere është një nga lagjet më karakteristike të qytetit, që ruan më mirë se të gjithë karakterin roman të
kryeqytetit, me rrugicat me kalldrëm, ku ngrihen shtëpitë mesjetare me ballkonet e vogla, nga të cilat zvarriten bimët kacavjerrëse. Gjatë periudhës perandorake, në këtë lagje banonte aristokratja Patrizia, e cila ndërtoi vilat e personazheve të famshme, si Giulio Cesare. Ndërsa gjatë mesjetës, Trastevere paraqitej si një labirint rrugicash të ndotura e të braktisura. Sot është ndër vendet më të preferuara për jetën e natës romane: gjatë natës popullohet nga të rinjtë që lënë takim me njëri-tjetrin në Piazza Trilussa, për të pirë një birrë nga ato të blerat nëpër pub-et që popullojnë rrugicat e ngushta të Trastevere-s.

7. Vizitoni Kishën e San Pietros 

San Pietro me kupolën e Michelangelo-s dhe fasadën e saj monumentale. Kisha e San Pietro-s dominon
sheshin skenografik me kolona të San Pietro-s, kryevepër arkitektonike e Bernini-t. Zemra e Kishës Katolike, kjo kishë lind aty ku në vitin 324 Kostandini ndërtoi  shenjtëroren për nder të Apostolit të I dhe pikërisht në këtë vend ai u kryqëzua dhe u varros. Në vitin 1506, Papa Giulio, emëroi Donato Bramante-n të projektonte ndërtimin e asaj që do të bëhej kisha më e madhe e botës (22000 m2 sipërfaqe). Bramante, Michelangelo, Giacomo della Porta ishin disa prej arkitektëve që u ndoqën nga të tjerë në “punishten e San Pietros” gjatë më shume se 100 vjetëve që u deshën për të përfunduar këtë vepër madhështore. Artistët më të mëdhenj të Rilindjes romane dhe të barokut, kanë lënë aty kryevepra të një bukurie të jashtëzakonshme: mjafton të përmendim “Mëshirën” e Michelangelo-s , katedralen  e San Pietro-s dhe tendën madhështore të Bernini-t.



8. Shopping në Via del Corso 

 Për ata që duan modën, Roma nuk të zhgënjen aspak. Mjafton të bësh një xhiro në rrugët e qendrës, Via del Corso, Via del Babuino, ku ndodhen firmat më të famshme italiane e ndërkombëtare, pa lënë pas dore zonën e Campo di Marzio: duhet vetëm të zgjidhni. Afër Piazza di Spagna, në fakt ndodhen dyqanet e veshjeve për meshkuj e femra, dyqanet e aksesorëve dhe të këpucëve. Roma ofron zgjidhje për të gjithë xhepat. Kush do të argëtohet me ngjyra të markave e të tezgave, nuk duhet të humbasë një vizitë në të zhurmshmen Porta Portese, më e madhja e më e frekuentuara e Romës.



9. Ushqehu alla Romana 

Çfarë hahet në Romë? Makaronat, salca e domateve, salloja dhe djathi i deles e bëjnë pjatën “ bucatini
all’amatriciana” një nga pjatat hiperkalorike numër 1, por ja vlen një herë në jetë. Kjo recetë origjinale lind nga Amatrice, një qytet i krahinës së Lazio-s, ku këto makarona ishin pjata tipike e barinjve dhe malësorëve të Apeninit Qendror. Më pas u shpërnda si recetë në të gjithë Italinë. Sikurse ndodh gjithmonë në artin kulinar, edhe kjo recetë ka pësuar ndryshime, të lidhura shpesh me shijet personale, që kanë sjellë në evoluimin e kësaj recete, por pa e prekur shijen e saj. Nisuni nga bucatini, por mos humbni edhe të gjitha pjatat e tjera tradicionale romane, si spaghetti alla carbonara, që me sa thuhet, ishin racionet e ushqimit të përditshëm të aleatëve gjatë Luftës së Dytë Botërore.



10. Jeta e natës në Romë 

Pasi të keni shëtitur ndër kisha e muzeume, mos mendoni as për një moment që dita e juaj mbaron me kaq.
Natën Roma është e pandalshme po aq sa ditën dhe duke mbledhur forcat e fundit që ju kanë mbetur, mund të zhyteni në jetën e natës romane, plot me restorante, lokale e diskoteka, që nuk të lenë aspak të mërzitesh. Duke pasur parasysh sa i madh është qyteti, mund ta imagjinoni sa alternativa të shumta ofron mbrëmja. Argëtime e zbavitje për të gjithë xhepat e mbi të gjitha, për të gjitha moshat. Mos humbisni Campo de Fiori me pub-et dhe të rinjtë që kalojnë aty natën.

10 GJËRAT QË DUHET TË BËSH NË VENECIA

Nëse do të pyesje zyrën e informacionit në Venecia për atraksionet që duhen parë patjetër, autoritetet me siguri do tju jepnin një listë të gjatë gjërash që duhen bërë. Këto janë rekomandimet tona për 10 gjëra që duhet të bësh në Venecia .  Kjo listë të ndihmon shumë sidomos kur ke një kohë të kufizuar. 

1.     Lëre veten të humbasë në Venecia

Nuk ka asgjë më të rëndësishme se sa ta lësh veten të rrëmbehet nga magjia e Venecias. Ec në rrugicat dhe kthinat e qytetit, ec pa fund dhe më e rëndësishmja mos ndiq turmën e turistave. Edhe nëse ke vetëm 3-4 orë në qytet të rekomandoj që të ecësh dhe eksplorosh rrugicat para se të shkosh në muze. Nuk ka më bukur se sa të përjetosh bukurinë e këtij qyteti në shëtitjen tënde të gjatë. 

2.     Vizito Bazilikën e Shën Markut

Mua më pëlqen të vizitoj kishat në Itali por kjo është nga më të bukurat e Italisë. Është e bukur jashtë dhe brenda.  Bazilika është një nga shembujt më të mirë të arkitekturës bizantine. Për shkak të mozaikeve bizantine dhe statusit të saj si simbol i fuqisë dhe pasurisë së Venecias njihet me emrin Kisha e Artë. Brenda në Bazilikë ka edhe disa muze të vegjël por duhet të paguash për hyrjen në to. Ndaj kjo vizitë duhet padyshim të diktohet nga buxheti dhe koha. Por nëse duhet të zgjedhësh atëherë duhet të zgjedhësh atë që mban statujat origjinale të kuajve në bronx të vendosura në Galerine e Bazilikes, sipër portës së madhe.

3.     Merr Vaporetto-n për një tur në kanalet e famshme 

Mendoj se mënyra më e mirë, më e lehtë dhe më e lezetshme të ecësh në Venecia është në këmbë por edhe përdorimi i gondolave apo Vaporetto-ve është një eksperiencë e paharrueshme dhe argëtuese transporti. Vaporetto me numrin 1 mund të ecë me të vërtetë ngadalë por është fantastik për një tur të gjatë në Grand Canal. Është njësoj sikur të jesh duke bërë një tur të qytetit me autobus, por duke shijuar një akullore të ëmbël. Mund të zgjedhësh shëtitjen me gondola, por sipas mendimit tim janë super të shtrenjta. 

4     Shiko Sheshin e Shën Markut …. kur është bosh!

Në sugjerimin e parë thamë që nuk duhet të ndjekësh turmën e turistëve dhe duke qenë se 99.9% drejtohen për tek sheshi Shën Markut do të jetë pak e vështirë. E rëndësishme është ta shohësh sheshin bosh kur të gjithë turistët kanë shkuar gjetkë. Koha më e mirë për ta parë sheshin e boshatisur është herët në mëngjes ose natën vonë. Venecia nuk ka një jetë nate të bollshme ndaj nuk duhet shumë kohë që të boshatisen dhe restorantet apo baret. Mua më pëlqen ta shoh sheshin herët në mëngjes, por zgjedhja është e juaja! 

5.    Furrat e Xhamit në Murano

Dyqanet e skulpturave të qelqit në Murano janë lehtësisht të aksesueshme me vaporetto dhe një eksperiencë vërtetë e këndshme. Duhet të përfshiheni në prodhimin e qelqit dhe të bëni stolitë tuaja autentike prej qelqi. Do të ndiheni si artizanët autentikë italianë. Vecchia Murano Glass Factory Castello është vendi ku mund të zbuloni traditën fituese të Venezianëve ndaj zjarrit, me prodhimet e xhamit gjatë kohës së Republikës në vitet 1291 pas djegjes së qytetit asaj kohe ndërtuar me dru, më pas artin e pikturimit në xham gjatë Rilindjes, madje nëse keni kohë mjaftueshëm mund të qëndroni shkurtimisht në një vizitë në Muzeumin e Xhamit të Muranos në Palazzo Giustiniani.

6.     Tur në Pallatin e Doxhit

 

Pallati i Dukës me pamje nga Sheshi i Shën Markut është një nga atraksionet më të rëndësishme të Venecias pas Bazilikës. Pallati I Dukës është një nga kryeveprat e stilit gotik venecian. I ndërtuar në vitet 1309 – 1324, pallati përvec se rezidencë e Dukes së Venecias, ka qenë gjithashtu qendër e shumë institucioneve të tjera politike si burgjet e vjetra apo gjykata e lartë, deri kur Venecia u pushtua  nga Napoleoni në vitin 1797. Një ndër të burgosurit e pallatit të Dukës ka qenë dhe Donzhuani i famshem Xhakomo Kasanova, i cili u dënua me 5 vjet, por që fatmiresisht arriti të arratisej. Arsyet për të vizituar Pallatin janë të panumërta dhe ia vlen të paguash tarifën turistike për ta vizituar atë. Ndalesa më e famshme gjatë këtij turi është padyshim ajo në Urën e Psherëtimave.

7.   Merr ashensorin drejt e në krye të Campanile-s

 

Po të ngjitesh në catinë e Bazilikës së Shën Markut, ke një pamje shumë të bukur të Sheshit të Shën Markut. Por nëse dëshiron të shohësh një pamje të bazilikës dhe piazzës bashkë bli një biletë për një ngjitje me ashensor në krye të Campanile-s, Kullës së Orës. Kulla e Orës – ndertesë e shekullit të XV. është vendosur në pozicion të tillë që të mund të shikohej nga ujrat e lagunës, dhe të mund ti tregonte të gjithëve për pasurinë dhe pushtetin e Venecias. Kulla është 98.6 m e lartë dhe gjendet përballe bazilikës së Shën Markut. Filloi të ndërtohej në shekullin e IX, dhe përfundoi në shekullin e XII. 

8.     Shëtit në rrugët e Buranos

Shëtitjen në ishullin magjepsës të Buranos do ta mbani mend gjatë. Burano ofron një kombinim ideal të bukurisë së natyrës dhe shtëpive karakteristike shumëngjyrëshe. Nuk do të reshtni së buzëqeshuri nga ndjesia positive që merr aty. 

9.     Vizito Ishullin Torcello.

Nëse ke më shumë kohë në dispozicion shko në ishullin Torcello, shumë pranë Buranos. Këtu je më larg arkitekturës dhe shumë më pranë natyrës. Në ishull jetojnë të paktën 20 persona dhe hoteli i vetëm është super i shtrenjtë. Atraksioni kryesor në Torcello është një kishë e shekullit të 7-të me mozaikë fantastikë. 

10.     Provo ushqime tradicionale

Duhet të vizitosh patjetër tregjet ushqimore sic është edhe tregu i Rialtos. Këtu do të mësosh se si venecianët trajtojnë dhe furnizohen me ushqime. Të gjithë bëjnë pazarin këtu. Tregu i Rialtos është I njohur për larminë e peshqve, perimeve dhe frutave.

Bonus.

Të dashuruarit pas Arti-t nuk duhet të humbasin një ndalesë në zonën hebreje, ku ju do të hasni shumë kisha të vogla dhe të bukur të tilla si Santa Maria dell Orto. Dy të tjera më pak të njohura janë kishat, ku mund të shihni kryeveprat e Canova dhe Titiani, pra bazilika e Santa Maria dei Frari Gloriosa dhe kishën e Santa Maria della Salute

4 vende që duhet të vizitosh patjetër në Francë

Franca konsiderohet si një nga vendet më të bukura për tu vizituar, madje të shumtë janë ata që shkojnë disa herë atje. Kjo sepse Franca ofron kaq shumë atraksione turistike sa që të shkosh vetëm një herë nuk mjafton. Sidoqoftë vizita juaj e parë duhet të jetë mbresëlënëse ndaj kemi menduar tju identifikojmë disa gjëra që mund të përfshini në listën tuaj të atraksioneve franceze më të njohura.  

1. Shtëpia dhe kopështet e Claude Monet

Admiruesit e Claude Monet do të kenë mundësi të shohin shtëpinë e piktorit të famshëm dhe zbulojnë muzën e tij të frymëzimit në zonën e Giverny. Kopështet këtu janë magjepsës dhe ndryshojnë në cdo stinë. Thuhet që Monet zgjodhi të jetontë në qytet pasi e pa atë gjatë një udhëtimi me tren. Giverny është një qytezë e këndshme që mund të arrihet duke marrë trenin nga Parisi në Vernon dhe më pas në Giverny.

Shtëpia dhe kopështet e Claude Monet

2. Versaja

Dikur ishte kryeqendra e Monarkisë Franceze, sot Pallati i Vesajës shfaq më së miri ekstravagancën e parisë mbretërore gjatë kulmit të sundimit të tyre. Kur je në Versajë është e vështirë të mos kuptosh pse Monarkia Franceze u rrënua. Pallati, sot mbetet një symbol culture dhe madje është deklaruar një Zonë e Mbrojtur nga Unesko. Pallati zë një sipërfaqe prej 67.000 m2 dhe përbëhet nga disa apartamente të shtuara nga monarkët gjatë gjithë sundimit të tyre. Versaja është një xhiro me tren larg Parisit.

Versaje

3.  Notre Dame de Reims

Ata që duan të shkojnë më tej mund të vizitojnë Notre Dame de Reims që ndodhet në orë larg kryeqytetit. Ky është vendi ku kurorëzoheshin mbretërit e Francës, duke marë një rëndësi historike dhe kryesore në gjithë monarkinë. Katedralja është gjithashtu një trashëgimi e mbrojtur nga UNESKO ndërkohë që në brendësi të saj gjenden dizenjo xhami të mrekullueshme. U deshën plot 20 vjet që kjo katedrale të përfundohej së ndërtuari.

Foto nga Sean MacEntee

4.  Paris

Nëse nuk ke shumë kohë për të udhëtuar nga qyteti në qytet, atëherë të eksplorosh atraksionet e Parisit mund të mjaftojë për një vizitë të parë në Francë. Qyteti mban në gjirin e tij Luvrin ku gjendet Monalisa e famshme. Kemi gjithashtu Kullën Eifel, Harkun e Triumfit e shumë të tjerë. 

Foto nga : Zoetnet

Kudo që të shkosh në Francë mos harro gjithashtu të ulesh në një nga kafenetë fantastike dhe të provosh kuzhinën franceze që do ta bëjë udhëtimin tuaj akoma më të paharrueshëm.